Endometrial polip əməliyyatları
Endometrial polip əməliyyatları
Endometrial poliplərin histeroskopiya ilə çıxarılması — minimal invaziv, adətən günübirlik prosedur.
Endometrial poliplər – uşaqlıq boşluğunun daxili qişası (endometrium) üzərində inkişaf edən xoşxassəli selikli törəmələrdir. Çox zaman kiçik və simptom vermədən rast gəlinirlər, lakin bəzi hallarda sonsuzluğa, nizamsız qanaxmalara və ya xərçəngönü dəyişikliklərə səbəb ola bilirlər. Əgər polipin ölçüsü böyüyərsə, şikayətlər artarsa və ya onun onkoloji riski varsa, çıxarılması mütləqdir. Əməliyyat histeroskopiya adlanan minimal invaziv üsulla aparılır və adətən günübirlik prosedur sayılır. Əməliyyata göstərişlər arasında uşaqlıq daxilində aşkarlanan endometrial polip, menstrual qanaxmanın artması və ya nizamsızlığı, ara qanamalar (xüsusilə menopauza sonrası dövrdə), sonsuzluq və ya təkrarlayan düşüklər, polipin ölçüsünün sürətlə artması, histoloji şübhəli nəticə və ya xərçəngönü hüceyrə dəyişiklikləri, həmçinin hormonal terapiya fonunda inkişaf edən poliplər yer alır.
Necə aparılır
Əməliyyat histeroskopiya üsulu ilə həyata keçirilir və ümumi qısa müddətli anesteziya altında aparılır. İlk mərhələdə uşaqlıq boynundan xüsusi alətlərlə daxil olaraq uşaqlıq boşluğu görüntülənir, polip vizual olaraq aşkarlanır və dəqiq sərhədləri müəyyən edilir. Sonra polip elektrik loop və ya mikroqayçı ilə tam şəkildə çıxarılır; lazım gəldikdə endometriumun qismən qazınması (küretaj) ilə əlavə toxuma nümunələri götürülür. Çıxarılan material histoloji müayinəyə göndərilir. Əməliyyat təxminən 15–30 dəqiqə çəkir və adətən həmin gün evə buraxılmaq mümkündür.
Hazırlıq
Əməliyyətdən əvvəl adətən USM və ya histeroskopik müayinə ilə polipin yeri və ölçüsü dəqiqləşdirilir, qan analizləri aparılır və anestezioloqla məsləhətləşmə edilir. Prosedur qısa müddətli anesteziya altında keçdiyi üçün cərrahın qərarına görə pasiyentə əməliyyatdan bir neçə saat əvvəl yeməkdən və içməkdən imtina etmək tövsiyə oluna bilər. Prosedur adətən menstruasiya bitdikdən sonrakı günlərdə planlaşdırıla bilər.
Bərpa dövrü
Pasiyent adətən əməliyyatdan bir neçə saat sonra evə buraxılır. Yüngül qarınaltı ağrılar və az miqdarda qanlı axıntı 1–3 gün müşahidə oluna bilər. 24–48 saat istirahət, daha sonra adi fəaliyyətə dönüş tövsiyə olunur. Histoloji nəticə adətən 5–7 gün ərzində hazır olur və nəticəyə əsasən əlavə müalicə planı tərtib edilir. Menstruasiya tsikli əməliyyatdan sonra 4–6 həftə ərzində bərpa olunur. Əgər əməliyyat sonsuzluq səbəbilə aparılıbsa, sonrakı dövrdə hamilə qalma şansı arta bilər.
Tez-tez verilən suallar
Endometrial polip əməliyyatı ağrılıdırmı?
Əməliyyat adətən qısa müddətli ümumi anesteziya altında aparıldığı üçün prosedur zamanı ağrı hiss olunmur. Əməliyyatdan sonra yüngül qarınaltı ağrılar və az miqdarda qanlı axıntı bir neçə gün müşahidə oluna bilər ki, bu da adətən normaldır.
Polip çıxarıldıqdan sonra yenidən əmələ gələ bilərmi?
Bəli, bəzi hallarda, xüsusilə hormonal disbalans davam edərsə, poliplər təkrar əmələ gələ bilər. Bu səbəbdən əməliyyatdan sonra müntəzəm ginekoloji nəzarət və zərurət olduqda hormonal qiymətləndirmə tövsiyə olunur.
Endometrial poliplərin əksəriyyəti xoşxassəli olsa da, xüsusilə menopauza sonrası dövrdə, hormonal müalicə fonunda və ya ailəvi xərçəng riski olan pasiyentlərdə polip daxilində xərçəngönü (atipik hiperplaziya) və ya erkən mərhələli endometrium xərçəngi aşkarlana bilər. Bu səbəbdən çıxarılan hər bir polipin histoloji analizi mütləqdir; erkən aşkarlanma zamanı müdaxilə həyat qurtarıcı ola bilər.
